प्रधानमन्त्री केपी शर्मा ओलीले आफू अझै १५ वर्ष निर्वाचनको अखडामा लड्न तयार रहेको बताएका छन् ।
बुधबार गृह मन्त्रालयमा संविधान दिवस तथा राष्ट्रिय दिवस मूल समारोह समितिको बैठकलाई सम्बोधन गर्दै उनले आफूलाई विरोधीहरुले ‘मरिहालोस्’ भनेको बताए ।
विरोधीहरुको सोचप्रति कटाक्ष गर्दै उनले ‘बाँचोस्, मुकाबिला गर्छौैं’ भन्नुपर्नेमा ‘मरोस्’ भनेको टिप्पणी गरे ।
‘एक जमानामा, एक समयमा हरेक मान्छे मर्छ’ भन्दै उनले अर्को निर्वाचन निकै कडा हुने र अहिलेदेखि नै तयारी थाल्न विपक्षीहरुलाई चुनौती दिए ।
‘आउँदो चुनाव पनि सामना गर्न तयार भएर बस्न म त्यस्तो चाहनेहरुलाई भन्न चाहन्छु, मरिगए हुन्थ्यो भन्ने चाहनेलाई’–उनले भने–‘आउँदो चुनाव ‘टफ’ हुनेछ । अस्तित्व रक्षाको लडाइँ अहिलेदेखि सुरु गरे हुन्छ ।’
सोही अवसरमा उनले आफू स्वास्थ्य परीक्षणका लागि बिहीबार (भोलि) सिंगापुर जान लागेको जानकारी दिए ।
उनले उपचारमा केही दिन लाग्ने बताउँदैै संविधान दिवसभन्दा अगाडि नै आइपुग्नेसमेत बताए । संविधान दिवस असोज ३ गते मनाइने गरिन्छ ।इमेजखबरबाट