पालगन्जमा संस्कृति, पर्यटन तथा नागरिक उड्डयन मन्त्री योगेश भट्टराईका कारण विमान डिले भएको विषयलाई लिएर सामाजिक सञ्जालमा आरोप-पत्यारोपको श्रृंखला चलिरहेको छ ।
मन्त्री भट्टराई पक्षधरहरुले उनको बचाउ गरिरहेका छन् । उनीहरु ज्ञानेन्द्र शाहीमाथि खनिएका छन् भने ज्ञानेन्द्र शाही पक्षधरहरुले मन्त्री भट्टराईको चर्को आलोचना गरिरहेका छन् ।
विमानस्थलमा पर्यटनमन्त्रीमाथि यात्रुले गरेको दुर्व्यवहारको भिडियो सामाजिक सञ्जालमा भाइरल बनेपछि सामाजिक सञ्जाल तातेको हो । आइतबार घटनाका विषयमा जानकारी दिन आयोजना गरिएको पत्रकार सम्मेलनमा नेकपाका कार्यकर्ताहरुले ज्ञानेन्द्र शाहीमाथि हात पात भएको शाही पक्षधरको आरोप छ ।
शाहीलाई प्रहरीले पक्राउ गरेपछि घटना झन पेचिलो बन्यो । शाहीलाई प्रहरीले आज दिउँसो छाडिसकेको छ । तर पनि घटना चर्किएकै छ ।यस विषयमा राजनीतिक दलका नेताहरुले समेत प्रतिक्रिया जनाइरहेका छन् ।
यही घटनालाई लिएर नेपाली कांग्रेसका युवा नेता गगन थापाले लोकतान्त्रिक गणतन्त्र नेपालमा ज्ञानेन्द्र शाही त के ज्ञानेन्द्र शाह पनि यहाँ स्वतन्त्रपूर्वक हिंड्न पाउने र आफ्नो विचार राख्न पाउने बताएका छन् ।
उनले सामाजिक सञ्जाल फेसबुकमा लेखेका छन्–
कमरेड! यो लोकतान्त्रिक गणतन्त्र नेपाल हो।ज्ञानेन्द्र शाही त के ज्ञानेन्द्र शाह पनि यहाँ स्वतन्त्रपूर्वक हिंड्न पाउँछन। आफ्नो विचार राख्न पाउँछन। गल्ति गर्नेलाई विधिले बांध्ने हो निषेध गर्ने होइन। सरकारको गति र मति ठिक पार्नुहोस् आफ्नो ‘अरिङगाल प्रवृत्ति’ छोड्नुहोस् परिवर्तन विरोधी तत्व आफै परास्त हुन्छन्।
यस विषयमा मन्त्री भट्टराईले आफ्ना कारण यात्रुमाथि भएको असुविधा प्रति माफी समेत मागि सकेका छन् ।khabarhub bata
