प्रधानमन्त्री केपी ओलीले पार्टीभित्र देखिएको विवाद आन्तरिक विषय भएकाले यसलाई समाधान गर्ने जिम्मेवारी पनि नेताहरुको भएको भन्दै जनताको जीवन रक्षामा जुट्न अपील गर्नुभएको छ ।
देशवासीलाई टेलिभिजन सम्बोधन गर्दै प्रधानमन्त्री ओलीले बाढी–पहिरोका कारण ३१ जनाको मृत्यु भएको र ३४ जना हराइरहेको जानकारी दिनुभयो ।
सरकारले बाढी पहिरोमा परेकाको उद्धार र राहतमा कुनै कसर बाँकी नराख्ने भन्दै उहाँले यस कार्यमा सघाउन सबैलाई अपील गर्नुभयो ।
मुलुक कोरोनाको कष्टकर अतिसाध्य, सलहको संकट र प्राकृतिक विपदसँग जुधिरहेका बेला प्रधानमन्त्री र सत्तारुढ दल नेकपाका नेताहरु सत्ताको लुछाचुँडीमा लागेको भन्दै तीब्र आलोचना भएपछि उहाँले देशवासीलाई सम्बोधन गर्नुभएको हो ।
कोरोना भाइरसको संकट अझै नहटेको भन्दै उहाँले पछिल्लो समय काठमाडौं उपत्यकामा कोरोना माहामारीको जोखिम बढ्दै गएको औल्याउनुभयो । समुदायमा संक्रमण फैलिएमा अवस्था भयावह हुने भन्दै उहाँले सामाजिक दुरी अपनाउन, मास्क र स्यानिटाइजर प्रयोग गर्न सल्लाह दिनुभयो ।
आफ्नै पार्टीका नेताहरुले आफूलाई पदबाट हटाउन खोजेकातर्फ संकेत गर्दै उहाँले महामारी र प्राकृतिक विपत्तिको समयमा राजनीतिक किचलो किन भन्ने प्रश्न उठ्नु स्वभाविक भएको उल्लेख गर्नुभयो ।
यसका लागि धैर्य र संयम आवश्यक पर्ने भन्दै ओलीले भन्नुभयो, ‘पार्टीभित्र हुने यस्ता छलफल, बहस र बिमतीहरु तिनका नितान्त आन्तरिक र कतिपय अवस्थामा नियमित प्रक्रिया पनि हुन् । यस्ता विषयहरु सम्बन्धित दल र तीनका नेताहरुले आपसी छलफलबाटै सुल्झाउनेछन् ।’
राजनीतिक स्थिरता, स्थायित्व र स्थापित प्रणालीमा किचित असर पर्न नदिने भन्दै उहाँले भन्नुभयो, ‘म आश्वस्त पार्न चाहन्छु, आम नेपालीहरुप्रति आपसी एकता बढाउन, संघीय लोकतान्त्रिक गणतन्त्रको रक्षा गर्न, राष्टिय स्वाभिमानमाथि उठाउन, देशको सार्वभौमसत्ता र भौगोलिक अखण्डता अक्ष्युण राख्न मेरो तर्फबाट दृढ अडान र हैदसम्मको प्रयास जारी रहनेछ ।’
जनताको जीवन रक्षाको दायित्वबाट विमुख भएर आन्तरिक विमती वा समस्यामा अल्झिन नसकिने भन्दै उहाँले सरकारको ध्यान र प्रयास महामारी र विपत्तिमा परेका नागरिकको जिउधनको रक्षामा केन्द्रित रहेको दाबी गर्नपनि छुटाउनु भएन ।
