कोरोना संक्रमणका कारण नेपाली कांग्रेसका एकजना पुराना नेता गोविन्द रञ्जितको मंगलबार निधन भएको छ ।
काठमाडौं वडा नम्बर-२१ कांग्रेस कार्यसमितिका अध्यक्ष रञ्जितलाई कोभिड-१९ पुष्टि भएपछि बलम्बुस्थित सशस्त्र प्रहरी अस्पतालमा भर्ना गरिएको थियो ।
भेन्टिलेटरमा राखेर उहाँको उपचार भइरहेको थियो । मंगलबार बिहान ६७ वर्षीय रञ्जितको निधन भएको परिवारले जनाएको हो ।
विगत ५० वर्षभन्दा बढी समयदेखि नेपाली कांग्रेसको राजनीति गर्नुभएका उहाँ समाजसेवामा पनि संलग्न रहँदै आउनुभएको थियो ।
कांग्रेसका जननायक बीपी कोइराला र सर्वोच्च नेता गणेशमान सिंह भारत प्रवासमा रहँदा उहाँपनि सँगै पार्टीको काममा सक्रिय हुनुहुन्थ्यो ।
उहाँको केही वर्षअगाडि हृदयाघात भएर शल्यक्रिया गरिएको थियो । उहाँको श्रीमती, दुई छोरी र दुई छोरा हुनुहुन्छ ।-imagekhabar.com
