काठमाडौं उपत्यकाका तीनवटा जिल्लाहरुमा जारी रहेको निषेधाज्ञाको स्वरूप परिर्वतन गरिएको छ । निजी सवारी र सार्वजनिकतर्फ १६ सिटभन्दा माथिकालाई जोरविजोर अनुसार सवारी साधन चलाउन पाउने निर्णय भएको हो । त्यस्तै, पसलकाे हकमा फरक प्रकृतिका पसललाई फरक दिनमा सञ्चालन गर्न पाउने व्यवस्था मिलाइएकाे छ । साे कुराकाे जानकारी काठमाडाैं जिल्लाका प्रजिअ जनकराज दाहालले बताउनुभयाे ।
यसैगरी, सरकारले सपिङमल खुल्ला गर्ने, जुत्ता कपडाजस्ता फेन्सि पसलहरु सोमबार, बुधबार र शनिबार तथा भाँडा पसल आदि आइतबार, मंगलबार र शुक्रबार खोल्न पाउने छन् । फुटपाथ पसलहरु विहान ११ बजेसम्म र दिउँसो ४ बजेदेखि ७ बजे सम्म खोल्न पाइनेछ । त्यस्तै, फर्निचर, अटोमोवाइल सोमबार र बुधबार खोल्न पाइनेछ । साथै, नाकामा अहिले जे व्यवस्था छ त्यही कायम रहनेछ ।
मंगलबार काठमाडौं, भक्तपुर र ललितपुरका प्रमुख जिल्ला अधिकारी, सुरक्षा निकाय,उद्योग वाणिज्य संघ, सरकारी चिकित्सक सम्मिलित भर्चुअल बैठक तथा उपत्यका मेयर फोरमले गरेकाे आग्रह अनुसार उपत्यकामा जारी करिब तीनहप्ते लामो निषेधाज्ञामा केही खुकुलो पारिएको हाे ।
गृहमन्त्रालयले अनुमोदन गरेसँगै तीनवटा जिल्लाका प्रमुख जिल्ला अधिकारीहरुले सूचना जारी गरेर निशेषाज्ञाको मोडलमा परिर्वतन भएको सूचना जारी गरेका हुन् ।
