सोलुखुम्बु। सोलुखुम्बुको खुम्बु क्षेत्रबाट वन्यजन्तुका छाला, खुट्टा र भरुवा बन्दुक सहित बाबु छोरा पक्राउ परेका छन् ।
खुम्बुपासाङल्हमू गाउँपालिका–१ बुप्साका मानवीर राईले लुकाइछिपाई वन्यजन्तुका अङ्ग र भरुवा बन्दुक राखेको गोप्य सूचनाका आधारमा खानतलासी गर्दा भेटिएपछि ७४ बर्षिय बाबु तिलकबहादुर राई सहित पक्राउ गरिएको जिल्ला प्रहरी कार्यालय सोलुखुम्बुका प्रहरी निरीक्षक महेन्द्र दर्नालले जानकारी दिनुभयो।
उनीहरुको घरबाट एक थान भरुवा बन्दुक, घोरलको छाला एक थान, मृगको खुट्टा दुई वटा, दुम्सीको काँडाहरु समेत नियन्त्रणमा लिइएको प्रहरीले जनाएको छ । दुबै जनालाई जिल्ला प्रहरी कार्यालय सोलुखुम्बुमा राखेर अनुसन्धान भइरहेको प्रहरी निरीक्षक दर्नालले बताउनुभयो ।
