नेपाली कांग्रेस सोलुखुम्बु प्रदेश ‘क’ सभापतिमा राईको उम्मेदवारी

नेपाली कांग्रेसको १४ औं महाधिवेशनमा सोलुखुम्बु प्रदेश ‘क’ सभापतिमा धनजन राईले उम्मेदवारी घोषणा गरेका छन् ।

गएको भदौ २२ गते सोलुखुम्बु जिल्लाभरिकै ५२ वटा वडामा सफलता पूर्वक वडा अधिवेशन सकिएपछि यहि असोज १२ गते हुने प्रदेश सभा क्षेत्रिय अधिवेशनमा सभापतिको उम्मेदवारी राईले घोषणा गरेका हुन् । राई यसअघि पनि सोलुखुम्बु प्रदेश ‘क’ तदर्थ समितिको क्षेत्रिय सभापति थिए ।

प्रदेश क्षेत्रिय सभापतिका उम्मेदवार राई वि.सं. २०४८ सालदेखि निरन्तर नेपाली कांग्रेसको राजनीतिमा सक्रिय रुपमा हालसम्म लागिरहेका छन् । तत्कालिन सशस्त्र माओवादी द्धन्द्धकालमा पनि उनी गाउँमै बसेर कांग्रेसको राजनीति गरेका थिए ।

को हुन् धनजन राई

सोलुखुम्बु जिल्लाको दक्षिण पश्चिममा अवस्थित साविकको सल्यान गाउँ विकास समिति वडा नं. ७ रुगाँ (हाल नेचासल्यान १)मा वि.सं. २०२३ सालमा उनी जन्मिएका थिए । उनको प्रारम्भिक शिक्षा गाउँमै भएको थियो ।

बाल्यकालदेखिनै शालिन र शान्त स्वभावका राई अझैपनि उस्तै स्वरुपमा देखिन्छन् । किशोर अवस्थादेखिनै विभिन्न सामाजिक सेवामा समर्पित भएका उनी युवा अवस्थामा पुगेपछि राजनीतिमा आकर्षित भएका थिए । वि.सं. २०४८ सालदेखि सक्रिय राजनीतिमा लागेका उनी एक वर्षपछि अर्थात वि.सं. २०४९ सालमा साविकको सल्यान गाउँ विकास समितिमा नेपाली कांग्रेसको तर्फबाट उपाध्यक्षको उम्मेदवारी दिएका थिए । निर्वाचनमा उनले अत्याधिक मत ल्याई उपाध्यक्षमा निर्वाचित भएका थिए ।

उपाध्यक्ष भएपछि उनले गरेको लोकप्रिय कामका कारण वि.सं. २०५४ सालमा पुन साविककै गाविसमा नेपाली कांग्रेसको तर्फबाट अध्यक्ष पदमा उम्मेदवारी दिए । उपाध्यक्ष हुँदा गरेको काम र अनुभवले अध्यक्ष पदमा पनि उनी अत्याधिक मतले चुनाव जिते । अध्यक्ष भएपछि उनले करिब १ वर्षजति मात्रै राम्रोसँग काम गर्न पाए । किनभने तत्कालिन समयमा सशस्त्र द्धन्द्ध गाउँगाउँमा फैलिरहेको थियो ।

उनी वि.सं. २०५५ सालमा नेपाली कांग्रेस सल्यान गाउँ पार्टीको सभापति भएका थिए । देशमा शसस्त्र द्धन्द्ध शुरु गरेको तत्कालिन माओवादीले नेपाली कांग्रेसका नेता, कार्यकर्ताहरुलाई छानीछानी कारबाहि गर्न थाले । उनीसँगैका धेरै नेता, कार्यकर्ताहरु गाउँ छोडेर सुविधा सम्पन्न शहरतिर लागे । तर, राईभने गाउँमै आम जनताको माझमा बसेर उनीहरुको दुःख, सुखमा साथ दिएर बसे ।

उनलाई पनि तत्कालिन माओवादीका नेता, कार्यकर्ताहरुले दिनुसम्मको दुःख दिए । भकारीमा राखेको धान झिकेर आफै कुटेर भात पकाएर खाईदिए । चन्दाको नाममा लाखौं रुपैयाँ लगे । आर्थिक, सामाजिक र भौतिक रुपमा उनलाई कारबाही गर्ने पटक-पटक चेतावनी दिए । तर, उनी गाविसको उपाध्यक्ष र अध्यक्ष हुँदा गरेको लोकप्रिय कामले बचायो । जनताको दुःख, सुखमा साथ दिएकैले उनी जनताको प्रिय नेता भएर निर्धक्कसँग जनताकै माझमा गाउँमा बसिरहे ।

अहिले पनि उनी गाउँमै बसेर नेपाली कांग्रेसको सक्रिय राजनीतिमा लागिरहेका छन् । संगठन विस्तारमा कहिले महाकुलुङ त, कहिले माप्य, कहिले थुलुङ दुधकोशी त कहिले सदरमुकाम पुगेर निरन्तर पार्टी संगठनमा लागिरहेका छन् ।

उनी स्थानीय तहको निर्वाचनमा नेचासल्यान गाउँपालिकामा नेपाली कांग्रेसको तर्फबाट उम्मेदवार भएर चुनावमा होमिए । तर, आफ्नै पार्टीका केहि नेताहरु उनको विरुद्धमा बागि उम्मेदवार दिएर उनलाई हराए ।

उनी राजनीतिमा मात्रै होइन गाउँको विभिन्न सामाजिक संघ संस्थाहरुमा पनि सक्रिय रुपमा सेवा गरिरहेका छन् । पदमा होस या नहोस उनी निरन्तर जनताको सेवामा लागिरहेकै छन् । ‘जनताको सेवा गर्न कुनै पद चाँहिदैन, मन भए पुग्छ ।’ नेता राईले भने । साभार -सगरमाथा अनलाइन

तपाईको प्रतिक्रिया

सम्बन्धित समाचार