सोलुखुम्बु। सोलुखुम्बुको थृुलुङ दूधकोशी गाउँपालिका–१ नेलेका अग्नी पीडितलाई सोलुदूधकुण्ड नगरपालिकाका नगरप्रमुख नाम्गेलजाङबु शेर्पाले पौने पाँच लाख भन्दा बढी नगद सहयोग हस्तान्तरण गर्नुभएको छ ।
नगरप्रमुख शेर्पाकोे पहलमा नगरपालिकासहित विभिन्न व्यक्तिहरुबाट सङ्कलित चार लाख ८९ हजार १५० रुपियाँ रकम अग्नी पीडित सहयोग समितिलाई आगलागी स्थलमै पुगेर हस्तान्तरण गनर््भएको हो ।
सङ्कलित सहयोग रकममा एन.आर.एन. न्यूयोर्क अमेरिका च्याप्टरका अध्यक्ष आङछिरिङ शेर्पाले सङ्कलन गरि पठाएको दुई लाख ८९ हजार १५० रुपियाँ, सोलुदूधकुण्ड नगरपालिकाबाट एक लाख ५० हजार रुपियाँ र मेयर शेर्पाको व्यक्तिगत ५० हजार रुपियाँ रहेको वडाध्यक्ष एवम् अग्नी पीडित सहयोग सङ्कलन समितिका अध्यक्ष घनराज सुनुवारले जानकारी दिनुभयो ।
मेयर शेर्पासहितको टोलीले घटनास्थलमै पुगेर हस्तान्तरण गरिएको रकम अग्नी पीडित सहयोग समितिको संयुक्त खातामा जम्मा गरिएको छ । नेलेका अग्नी पीडितको राहतका लागि आफू सुरुदेखि नै खटिरहेको र आगामी दिनमा पनि सहयोग सङ्कलनका लागि सक्दो पहल गर्ने मेयर शेर्पाले प्रतिबद्धता व्यक्त गर्नुभएको छ ।
यही पुस ५ गते मङ्गलबार दिउँसो करिब ४ बजे वडा नम्बर १ को साप्ताहिक हाट नेले बजारमा भएको आगलागीमा चार घर पूर्ण रुपमा नष्ट भएका थिए । उक्त घटनामा कल्पना बस्नेत, रमेश बस्नेत, वुद्विबहादुर कार्की र गणेश बस्नेतको घर पूर्ण रुपमा जलेर क्षति भएको थियो भने प्रणय राईको घरमा आंशिक क्षति भएको थियो ।