विश्वकै उच्च स्थानमा छायाङ्कन गरिएको म्यूजिक भिडियोबाट गिनिज बुक अफ वल्र्ड रेकर्डमा नाम लेखाउन सफल पाँच जना नेपाली सम्मानित भएका छन् ।
हिमाल एफएमको आयोजना तथा राईको ब्राण्डको प्रायोजनमा काठमाण्डौँमा आयोजित एक कार्यक्रममा पुष्कर नेपाल, सञ्चबहादुर राई, राजन खरेल, लक्ष्मण कार्की र पावल राई सम्मानित हुनुभएको हो । रेकर्ड होल्डरलाई नेपालका प्रथम उपराष्ट्रपति परमानन्द झा, रिपोटर्स क्लब नेपालका अध्यक्ष ऋषि धमला र हिमाल एफएमका अध्यक्ष निमा शेर्पाले संयुक्त रुपमा सम्मान गर्नुभएको हो ।
नेपाल यसअघि तीन पटक विभिन्न विधामा गिनिज बुकमा नाम लेखाइसकेका व्यक्ति हुनुहुन्छ । सञ्च एक पर्यटन व्यवसायी तथा प्रोजेक्टका योजनाकार र व्यवस्थापक हुनुहुन्छ । खरेल मिडियाकर्मी, पावल कुशल बाँसुरी बाधक, लक्ष्मण पर्यटन व्यवसायी हुनुहुन्छ । रेकर्ड होल्डरसँगै भिडियो छायाङ्कनमा सहभागी गायिका, मोडल, गीतकार, संगीतकार, एरेन्जर, निर्देशक, रेकडिष्ट, सम्पादक, प्राविधिक लगायतलाई सम्मान गरिएको छ ।
समुद्री सतहदेखि चार हजार ८१३ मिटरको उचाईमा अवस्थित ‘गोक्यो रि’मा लाईभ अडियो रेकर्ड तथा भिडियो छायाङ्कन गरी नेपालकोतर्फबाट वल्र्ड रेकर्ड कायम गरिएको हो । ‘गोक्यो रि’ सोलुखुम्बुको खुम्बु पासाङल्हामू गाउँपालिकामा पर्दछ ।
कार्यक्रमका अवसरमा नेपालका प्रथम उपराष्ट्रपति परमानन्द झाले अद्धितिय काम गरी रेकर्ड कायम गरेकोमा नेपाली टिमलाई बधाई दिनुभयो । पर्यटन प्रर्वद्धन समेत हुने गरी विश्वकैै उच्च भूगोलमा पुगेर किर्तिमानी कायम गर्न चानचुने विषय नभएको भन्दै उपराष्ट्रपति झाले गिनिज बुकको रेकर्डले नेपाल र नेपालीको शान उच्च बनाएको धारणा राख्नुभयो ।
तपाईहरुको कामले मैले पनि गौरब महसुस गरेको छु, उहाँले भन्नुभयो । गिनिज बुकमा नाम लेखाउने नेपालीहरुको माध्यमबाट नै नेपालको नाम अन्तर्राष्ट्रियस्तरमा परिचित भएको उहाँको भनाइ छ ।
त्यस अवसरमा वरिष्ठ पत्रकार तथा रिपोटर्स क्लब नेपालका अध्यक्ष ऋषि धमलाले राम्रो काम गर्नेलाई राष्ट्रले सम्मान गर्नुपर्ने बताउनुभयो । कला तथा संस्कृतिकै कारण अन्र्तराष्ट्रियस्तरमा नेपाललाई चिनाएको दावी गर्दै उहाँले गौरवपुर्ण काम गर्ने व्यक्तिलाई राज्यले उचित सम्मान दिनुपर्नेमा जोड दिनुभयो ।
प्रतिनिधिसभा सदस्य हेमकुमार राई ‘सुरवीर’ले गीत संगीत मार्फतनै गिनिज बुकमा नाम लेखाउँदै पर्यटन प्रर्वद्धनमा टेवा पुर्याएकोमा बधाई दिनुभयो ।
त्यस्तै, हिमाल एफएमका सल्लाहकार तथा राजनीतिज्ञ आङगेलु शेर्पाले रेकर्ड होल्डरको उपलब्धी राष्ट्रकै उपलब्धि भएको बताउनुभयो । उहाँले यो उत्साहलाई अझ देश र जनताको पक्षमा प्रयोग गर्न रेकर्ड होल्डरलाई आग्रह गर्नुभयो ।
हिमाल एफएमका सचिव कर्मा शेर्पाले वल्र्ड रेकर्डलाई आधार बनाएर पर्यटन प्रवद्र्धनमा योगदान गर्न आग्रह गर्नुभयो । अब नेपालमा पर्यटक बोलाउनुहोस्, पर्यटन क्षेत्र कोरोना कारण शिथिल बनेको छ, पर्यटन क्षेत्र चलायमान बनाउन तपाईको सक्रियता बढोस्, उहाँले आग्रह गर्नुभयो ।
चौथो पटक गिनिज बुकमा नाम लेखाउन सफल पुष्कर नेपालले रेकर्डले व्यक्तिसँगै पर्यटन र नेपाली संगीतको टेवाका लागि उच्च स्थानमा पुगेर रेकर्ड बनाएको बताउनुभयो ।
२०२० नोभेम्बर ७ मा ‘गोक्यो रिमा पुगेर भिडियो छायांकन गरेका थियौँ, यो रेकर्ड कायम गर्नका लागि सहयोग गर्ने सम्पूर्णमा धन्यवाद, उहाँको भनाइ छ । रेकर्ड होल्डर पाँच जना भएपनि अन्य सहभागीको पनि यो सफलता भएको उहाँको भनाइ छ ।
