खुम्बु जोड्ने पुल निर्माणले लियो गति

सन्तोष राउत/सोलुखुम्बु । सोलुखुम्बुको व्यस्त पर्यटकीय क्षेत्र खुम्बु जाने स्थलमार्गमा पर्ने सोलूदुधकुण्ड नगरपालिका–१ टाक्सिन्दु र माप्यदूधकोशी गाउँपालिका–१ जुभिङ जोड्ने मोटरेबल पुल निर्माण तिव्र गतिमा भइरहेको छ ।

गएको जेठको अन्तिममा शिलन्यास गरी निर्माण थालिएको पर्यटकीय मार्गमा पर्ने उक्त पक्की पुल महादेब खिम्ती हिराचन जेभीले सात करोड छ लाख ३३ हजार रुपियाँको लागतमा निर्माणको जिम्मा लिएको हो ।

५० मिटर लम्बाई र ११ मिटर चौडाई रहेको पुल फ्रि स्ट्रेच प्रविधिबाट बन्ने पुलको एकापट्टिको पिलर तयार भइसकेको निर्माण कम्पनीका प्रतिनिधि बुद्धिबहादुर मगरले बताउनुभयो । रातमा समेत काम गरेर तिव्र गतिमा निर्माण भइरहेको र गुणस्तरीय काम गरी पुल समयमै निर्माण सम्पन्न गर्ने उहाँले बताउनुभयो ।

सम्झौता केही समय अघि भए पनि निर्माणस्थलसम्म पुग्ने सडकमा यातायातका साधन चल्न नसकेका कारण सामान ढुवानी गर्न नपाउँदा निर्माण शुरु गर्न केही ढिला भएको र अब फटाफट काम गर्ने उहाँको भनाइ छ ।

माप्य हुँदै खुम्बु जोड्ने सडक खण्ड भएकाले दूधकोशी नदीमाथि बन्ने यो मोटरेबल पुलले माथिल्लो सोलुको पर्यटन क्षेत्रमा धेरै सहयोग पुग्ने सोलुदूधकुण्ड नगरपालिकाका मेयर नाम्गेलजाङ्बु शेर्पाले बताउनुभयो । खुम्बु जोड्ने छोटो मार्गको रुपमा यो सडक रहेकाले तोकिएको समयमा गुणस्तरीय काम गर्न ठेकेदार कम्पनीलाई मेयर शेर्पाले निर्देशन दिनुभयो ।

पुल निर्माण भएपछि खुम्बु क्षेत्रमा सहज ढुवानी हुने भएकाले दैनिक उपभोग्य सामाग्रीहरुको मूल्य समेत सस्तिने स्थानीय बताउँछन् । यो पुल निर्माण पश्चात सदरमुकाम आवतजावत गर्न तथा पर्यटकलाई खुम्बु जान स्थलमार्गबाट धेरै सहज हुने भन्दै खरिखोलाका भलाकाजी मगरले खुशी व्यक्त गर्नुभयो ।

तपाईको प्रतिक्रिया

सम्बन्धित समाचार